नगर परिषद - नगर पंचायत निवडणुका 2025 : रायगड जिल्ह्यात कडक बंदी आदेश जारी

* भारतीय नागरिक सुरक्षा संहिता कलम 163 नुसार 30 नोव्हेंबर ते 2 डिसेंबरपर्यंत निर्बंध ; 5 जणांपेक्षा जास्त जमाव, प्रचार, लाउडस्पीकर, बुथ, वाहने यांना मनाई

रायगड / प्रतिनिधी :- राज्य निवडणूक आयोगाने जाहीर केलेल्या नगर परिषद / नगर पंचायत सार्वत्रिक निवडणूक कार्यक्रम 2025 अनुषंगाने 2 डिसेंबर 2025 रोजी रायगड जिल्ह्यात मतदान होणार आहे. मतदान शांततेत, स्वच्छ व निर्भय वातावरणात पार पाडण्यासाठी जिल्हाधिकारी किशन जावळे यांनी भारतीय नागरिक सुरक्षा संहिता, 2023 चे कलम 163 नुसार कडक बंदी आदेश जारी केला आहे. हा आदेश 30 नोव्हेंबर 2025 रोजी सायंकाळी 6 ते 2 डिसेंबर 2025 रोजी सायंकाळी 7 पर्यंत अंमलात राहणार आहे.

* मतदानपूर्व 48 तास कडक निर्बंध :- मतदान खुल्या, स्वच्छ आणि निष्पक्ष वातावरणात व्हावे यासाठी एकत्रित जमाव व प्रचारावर मनाई, 5 पेक्षा जास्त व्यक्तींचा जमाव मनाई, सार्वजनिक सभा, रॅली, बैठकांना मनाई, घरोघरी जाऊन प्रचार करण्यास मंजुरी, प्रचारासाठी बल्क मेसेजिंग पूर्णपणे बंदी घालण्यात आली आहे.

* बाहेरील कार्यकर्त्यांना प्रवेशबंदी :- मतदान क्षेत्रात जे मतदार नाहीत असे बाहेरील कार्यकर्ते, नेते, प्रचारक मिरवणुकीतील सदस्य यांना नगर परिषद / नगर पंचायत हद्दीत थांबण्यास मनाई करण्यात आली आहे.

* लाउडस्पीकर, मेगाफोन, गोंधळ यावर बंदी :- मतदान केंद्राच्या 100 मीटर परिसरात लाउडस्पीकर, मेगाफोन, ओरडणे, घोषणाबाजी, गोंधळ यास संपूर्ण मनाई करण्यात आली आहे.

* मतदान केंद्र परिसरात मोबाईल, वायरलेसवर निर्बंध :- 100 मीटर परिसरात मोबाईल फोन, वायरलेस, इतर कोणतेही संपर्क साधन (अपवाद : अधिकारी/कर्मचारी/सुरक्षा दल) यांना बंदी घालण्यात आली आहे.

* शस्त्रांवर बंदी :-  मतदान केंद्राच्या 100 मीटरमध्ये कोणालाही शस्त्र नेण्यास मनाई करण्यात आली असून सुरक्षा अधिकारी, SPG/Z+ संरक्षित व्यक्तीस एक शस्त्रधारी सुरक्षा रक्षक (साध्या वेशात) अपवाद आहे.

* मतदान बुथ व वाहनांवरील बंदी :- मतदान केंद्राच्या 200 मीटरमध्ये कोणतेही वाहन नेणे मनाई असून अपवाद अपंग, वृद्ध व आजारी मतदारांची वाहने ही राहतील. 200 मीटर आत निवडणूक बुथला मनाई असून 200 मीटर बाहेर बुथसाठी स्थानिक स्वराज्य संस्थेची परवानगी आवश्यक, डी.आर.ओ.ला आगाऊ कळविणे, बुथचा आकार 10X10 पेक्षा कमी, फक्त 1 टेबल + 2 खुर्च्या राहतील.

यासह मतदान केंद्राजवळील पक्ष कार्यकर्त्यांच्या निवासस्थानी प्रचार मनाई, मतदारांना दिल्या जाणाऱ्या चिठ्ठ्या पांढऱ्या कागदावर, कोणतेही नाव/चिन्ह नसावे, मतदान केंद्राच्या 100 मीटर परिसरात व्यापार/आस्थापना चालू ठेवण्यास मनाई करण्यात आली आहे.

हा आदेश मोडणाऱ्याविरुद्ध भारतीय न्याय संहिता, 2023 चे कलम 223 नुसार कठोर कायदेशीर कारवाई होणार आहे, असे कळविण्यात आले आहे.