विठ्ठल दर्शनानंतर महायुतीच्या प्रचाराचा शुभारंभ

* खोपोली नगरपालिकेवर महायुतीचा भगवा फडकेल

* नगराध्यक्ष पदाचे उमेदवार कुलदीपक शेंडेंचा विश्वास 

खोपोली / फिरोज पिंजारी :- खोपोली - खालापूर परिसरातील लाखों भाविक भक्तांचे श्रद्धास्थान असलेल्या धाकटी पंढरी येथील विठ्ठलाच्या दर्शनाने खोपोली नगर परिषद निवडणुकीतील महायुतीच्या प्रचाराला औपचारिक सुरुवात आज 19 नोव्हेंबरपासून झाली. विठ्ठल मंदिरात दर्शन घेऊन, नारळ फोडून उत्साहपूर्ण वातावरणात प्रचाराचा शुभारंभ करण्यात आला.

यावेळी महायुतीच्या नगराध्यक्ष पदाचे उमेदवार कुलदीपक शेंडे यांनी मोठ्या आत्मविश्वासाने सांगितले की, विठुरायाच्या कृपेने व मतदारांच्या पाठींब्याने या निवडणुकीत खोपोली नगर पालिकेवर महायुतीचा भगवा नक्कीच फडकेल. 

* भाजप - शिंदे गट - आरपीआय आणि मित्रपक्ष एकत्र मैदानात :- महायुतीच्या पॅनेलतर्फे नगराध्यक्ष पदाचे उमेदवार कुलदीपक शेंडे, प्रभाग क्रमांक 9 मधील उमेदवार राजू दूमने व रजिया खान तसेच महायुतीचे विविध प्रभागातील उमेदवार व पदाधिकारी, शिवसेना खोपोली शहर प्रमुख तथा उमेदवार संदीप पाटील, हरिश काळे, अर्चना पाटील, रूपाली जाधव, प्रमोद महाडीक, दिलीप जाधव, अनिता पवार, वंदना सावंत, रेश्मा गायकवाड, अनिल मिंडे, मुस्कान सय्यद, अनिल सानप, प्राची कांबळे, मयूरी शेलार, श्रुती पोटे, मानसी काळोखे, उज्वला महाडीक यांच्यासह भाजप, शिवसेना (शिंदे गट), आरपीआय आणि मित्रपक्षांचे विविध नेते, पदाधिकारी, कार्यकर्ते याप्रसंगी मोठ्या संख्येने उपस्थित होते. कार्यकर्त्यांच्या घोषणांनी धाकटी पंढरी परिसर दणाणून गेला.

* दर्शनानंतर प्रभाग 9 मध्ये घरोघरी संपर्क मोहीम :- विठ्ठल दर्शन घेतल्यानंतर महायुतीचे उमेदवार आणि कार्यकर्त्यांची भव्य संपर्क मोहीम सुरू झाली. या मोहिमेत साजगाव विठ्ठल मंदिर, साजगाव बौद्धवाडा, ताकई, बोंझर, आदोशी, शिळगाव, पटेल नगर मिळगाव वाडी या महत्वाच्या परिसरांचा समावेश होता. या संपूर्ण भागात नगराध्यक्ष पदाचे उमेदवार कुलदीपक शेंडे तसेच नगरसेवक पदाचे उमेदवार राजू दूमने आणि रजिया खान यांनी मतदारांशी संवाद साधत आपली दृष्टी व नियोजन मांडले.

* कार्यकर्त्यांचा जोश - महायुतीचा आत्मविश्वास वाढला :- दर्शनाचे धार्मिक वातावरण, कार्यकर्त्यांचा दणदणीत उत्साह आणि प्रभागातील घरोघरी झालेल्या संवाद मोहिमेमुळे महायुतीचा आत्मविश्वास अधिक वृद्धिंगत झाल्याचे दिसून आले. खोपोली नगर परिषद निवडणुकीत महायुती पूर्ण शक्तीनिशी उतरत असून प्रचाराची गती आगामी दिवसांत आणखी वाढणार आहे, अशी प्रतिक्रिया शिवसेना पदाधिकारी व कार्यकर्ते यांनी व्यक्त केली.