NH47 वर महामार्ग सुरक्षा पथकाच्या गाडीमुळे भीषण अपघात - तीन वाहनांची साखळी धडक!

* निष्काळजीपणाचा परिणाम ; बॅरिकेड व चेतावनीशिवाय उभी होती सरकारी गाडी - सुदैवाने जीवितहानी टळली

कोराडी (नागपूर) / मिलिंद गाडेकर :- कोराडी जवळील NH47 महामार्गावर आज सकाळी एक गंभीर अपघात झाला. या घटनेत महामार्ग सुरक्षा पथकाची सरकारी गाडी आणि दोन ट्रक यांचा सहभाग असून अपघातानंतर महामार्गावरील वाहतूक काही तास ठप्प राहिली. सुदैवाने या भीषण धडकेत कोणतीही जीवितहानी झालेली नाही, मात्र सरकारी वाहनाच्या निष्काळजीपणावर स्थानिकांनी तीव्र संताप व्यक्त केला आहे.

प्रत्यक्षदर्शींच्या माहितीनुसार, महामार्ग सुरक्षा पथकाची गाडी सकाळपासूनच रस्त्याच्या मध्येच बंद पडलेली होती. त्यांनी बॅरिकेड, “थांबा” चिन्ह किंवा डायव्हर्ट बोर्ड काहीच लावले नव्हते. दरम्यान, महामार्गावरून येणारा वेगवान कंटेनर ट्रक सरकारी गाडी वेळेवर पाहू शकला नाही, आणि सरळ जाऊन त्या गाडीला जोरदार धडक दिली. धडकेचा आवाज इतका मोठा होता की, काही अंतरावरूनही नागरिक धावून आले. धडकेनंतर ट्रक चालकाने ब्रेक लावण्याचा प्रयत्न केला, परंतु त्याच वेळी मागून येणारा दुसरा ट्रक वेळेत थांबू शकला नाही आणि तोही पुढच्या ट्रकला जाऊन आदळला. यामुळे तीन वाहनांची साखळी धडक होऊन महामार्गावर काही काळ गोंधळाचे वातावरण निर्माण झाले.

या घटनेनंतर स्थानिक नागरिक आणि वाहनचालकांनी महामार्ग सुरक्षा पथकाच्या बेफिकीरीवर तीव्र नाराजी व्यक्त केली. वाहनचालकांकडून लहान वाहनांसाठीसुद्धा ‘आपत्कालीन त्रिकोण चिन्ह’ आणि चेतावणी लाइट्स बाळगणे बंधनकारक असताना, सरकारी पथकाच्या वाहनानेच तो नियम पाळला नाही, अशी टीका करण्यात आली. नियम सर्वांसाठी समान असायला हवेत. पथकाचे वाहनच जर चेतावणी न देता मध्येच उभे राहिले, तर सामान्य वाहनचालकांनी सुरक्षितता कशी राखायची ? असा सवाल स्थानिकांनी उपस्थित केला.

अपघातामुळे NH47 वर काही तास वाहतुकीची मोठी कोंडी झाली होती. स्थानिक पोलिसांनी तत्काळ घटनास्थळी धाव घेतली आणि वाहतूक सुरळीत करण्यासाठी दोन्ही दिशेचे वाहनमार्ग बंद करून क्रेनच्या साहाय्याने वाहने बाजूला करण्यात आली. दुपारी सुमारास रस्ता पुन्हा वाहतुकीसाठी खुला करण्यात आला. अपघातस्थळावरील वाहनांचे नुकसान गंभीर स्वरूपाचे झाले असून कंटेनर ट्रकचे समोरचे भाग पूर्णपणे चुरगळले आहेत.

प्रशासनाने या घटनेची औपचारिक चौकशी सुरू केली आहे. महामार्ग सुरक्षा पथकाच्या निष्काळजीपणामुळे हा अपघात झाला का ? तसेच सुरक्षा नियमांचे पालन झाले की नाही ?  याची तपासणी करण्याचे निर्देश वरिष्ठ अधिकाऱ्यांनी दिले आहेत. प्राथमिक तपासात असे दिसून आले आहे की, गाडी बंद पडल्याची माहिती उच्चाधिकाऱ्यांना वेळेवर दिली गेली नव्हती आणि त्यामुळे आपत्कालीन व्यवस्था उभी राहण्यात विलंब झाला.

NH47 वरील ही घटना पुन्हा एकदा रस्ते सुरक्षा आणि प्रशासनाच्या जबाबदारीचा प्रश्न उभा करते. सरकारी वाहनांकडूनच जर नियमांचे पालन नसेल, तर अपघातांची साखळी वाढतच जाणार, असा इशारा वाहनचालक संघटनांनी दिला आहे. महामार्ग सुरक्षा म्हणजे फक्त बोर्ड नाही, तर जबाबदारी आहे आणि ती प्रत्येक वाहनाने, मग ते सरकारी असो वा खाजगी, पाळलीच पाहिजे.