आमदार किशोर आप्पा पाटील यांची अमरावती लोकसभा शिवसेना संपर्कप्रमुखपदी नियुक्ती

* संघटन कौशल्यावर पक्षाचा विश्वास

* राज्य पातळीवर जबाबदारी वाढली

पाचोरा / फिरोज पिंजारी :- पाचोरा-भडगाव विधानसभा मतदारसंघात सलग तीन वेळा विजय मिळवत दमदार नेतृत्व सिद्ध करणारे आमदार किशोर आप्पा पाटील यांच्यावर शिवसेना पक्षाने आणखी एक महत्त्वाची जबाबदारी सोपवली आहे. शिवसेना पक्षप्रमुख तथा राज्याचे उपमुख्यमंत्री एकनाथ शिंदे यांच्या आदेशानुसार आमदार पाटील यांची अमरावती लोकसभा क्षेत्राच्या शिवसेना संपर्कप्रमुखपदी नियुक्ती करण्यात आली आहे. या नियुक्तीमुळे त्यांच्या राजकीय कारकिर्दीत नवा टप्पा गाठला गेला असून त्यांच्या संघटन कौशल्याची राज्यस्तरावर दखल घेतल्याचे स्पष्ट झाले आहे.

आमदार किशोर आप्पा पाटील यांनी आपल्या मतदारसंघात केवळ निवडणुकीत विजय मिळवला नाही, तर कार्यकर्त्यांचे मजबूत जाळे उभे केले आहे. गावागावात जाऊन संवाद साधणे, स्थानिक समस्या जाणून घेऊन तातडीने उपाययोजना करणे आणि सर्व घटकांना सोबत घेऊन काम करणे, ही त्यांची कार्यशैली विशेष मानली जाते. त्यांच्या या गुणांमुळेच त्यांना अमरावतीसारख्या महत्त्वाच्या लोकसभा क्षेत्राची जबाबदारी देण्यात आली आहे.

आमदार पाटील यांचा राजकीय प्रवास पाहिला असता, त्यांनी सुरुवातीपासूनच कार्यकर्त्यांशी सुसंवाद ठेवला आहे. कोणत्याही स्तरावरील कार्यकर्ता असो, त्याच्या अडचणी समजून घेऊन त्याला योग्य मार्गदर्शन करणे हे त्यांचे वैशिष्ट्य राहिले आहे. जाती-धर्म किंवा पक्षभेद न ठेवता सर्वांना समान वागणूक देण्यामुळे त्यांना व्यापक लोकसमर्थन मिळाले आहे.

अमरावती लोकसभा क्षेत्र हे राजकीय दृष्ट्या महत्त्वाचे मानले जाते. विविध सामाजिक आणि राजकीय घटकांचा प्रभाव असलेल्या या भागात संघटन मजबूत करण्यासाठी सक्षम नेतृत्व आवश्यक असते. आमदार पाटील यांच्या नियुक्तीमुळे या क्षेत्रात शिवसेनेची ताकद वाढेल, असा विश्वास व्यक्त केला जात आहे. या नियुक्तीनंतर शिवसेना कार्यकर्त्यांमध्ये उत्साहाचे वातावरण निर्माण झाले आहे. अनेक कार्यकर्त्यांनी आमदार पाटील यांचे अभिनंदन करीत त्यांच्या पुढील वाटचालीस शुभेच्छा दिल्या आहेत. त्यांच्या नेतृत्वाखाली अमरावती लोकसभा क्षेत्रात संघटन विस्ताराला नवी दिशा मिळेल, अशी अपेक्षा व्यक्त होत आहे.

आमदार किशोर आप्पा पाटील यांच्यासाठी ही नियुक्ती केवळ पदवाढ नसून मोठी जबाबदारी आहे. त्यांनी आतापर्यंत ज्या पद्धतीने काम केले, त्याच पद्धतीने आता व्यापक स्तरावर काम करून पक्ष अधिक बळकट करण्याचे आव्हान त्यांच्यासमोर आहे. त्यांच्या कार्यक्षमतेवर विश्वास ठेवूनच पक्षाने ही जबाबदारी सोपवली आहे.