मजुराच्या मुलाची कमाल !

* कोचुर बुद्रुकच्या हर्षल पाटील यांचे MPSC मध्ये राज्य कर सहाय्यक अधिकारी पदावर दमदार यश

* अत्यंत प्रतिकूल परिस्थितीतून जिद्दीच्या जोरावर घडवली यशोगाथा, आई-वडिलांच्या त्यागाला मिळाले फळ

रावेर / प्रतिनिधी :- रावेर तालुक्यातील कोचुर बुद्रुक या छोट्याशा गावातून एक प्रेरणादायी आणि अभिमानास्पद यशोगाथा समोर आली आहे. अत्यंत प्रतिकूल परिस्थितीत वाढलेल्या हर्षल पाटील यांनी आपल्या अथक परिश्रम, जिद्द आणि चिकाटीच्या बळावर महाराष्ट्र लोकसेवा आयोगाच्या (MPSC) माध्यमातून राज्य कर विभागात राज्य कर सहाय्यक अधिकारी (Tax Assistant) पद मिळवत उल्लेखनीय यश संपादन केले आहे. त्यांच्या या यशामुळे संपूर्ण परिसरात आनंद आणि अभिमानाचे वातावरण निर्माण झाले आहे.

कोचुर बुद्रुकसारख्या ग्रामीण भागात वाढतांना शिक्षणासाठी आवश्यक सुविधा, मार्गदर्शन आणि शांत वातावरणाचा अभाव असतो. अशा परिस्थितीतही हर्षलने हार न मानता अधिकारी होण्याचे स्वप्न मनाशी बाळगले आणि त्या दिशेने सातत्याने प्रयत्न सुरू ठेवले. मर्यादित साधनसामग्री असूनही त्याने अभ्यासात सातत्य ठेवत आपल्या ध्येयाकडे वाटचाल केली.

* आई-वडिलांचा संघर्ष ठरला यशाचा आधार :- हर्षलच्या यशामागे त्याच्या आई-वडिलांचा मोठा त्याग आणि संघर्ष आहे. वडील वसंता पाटील हे मजुरी करून कुटुंबाचा उदरनिर्वाह करतात. कठोर परिश्रम करून त्यांनी मुलाच्या शिक्षणासाठी कोणतीही तडजोड होऊ दिली नाही. आई प्रमिला पाटील यांनी स्वतःच्या इच्छा-आकांक्षा बाजूला ठेवून मुलाच्या शिक्षणासाठी प्रत्येक क्षण खर्च केला. घरातील प्रत्येक रुपया जपून मुलाच्या उज्ज्वल भविष्यासाठी वापरला.

* संकटांवर मात करीत गाठले यशाचे शिखर :- आर्थिक अडचणी, मर्यादित साधने आणि अनेक अडथळ्यांवर मात करीत हर्षलने अभ्यासात सातत्य ठेवले. आत्मविश्वास, कष्ट आणि कुटुंबाचा भक्कम पाठिंबा यामुळेच त्याने हे यश संपादन केले. त्याच्या प्रवासात आलेल्या प्रत्येक संकटावर मात करीत त्याने स्वतःची वेगळी ओळख निर्माण केली आहे.

* आई-वडिलांच्या डोळ्यात आनंदाश्रू :- निवडीची बातमी समजताच पाटील कुटुंबात आनंदाचा जल्लोष पसरला. आईच्या डोळ्यात समाधानाचे अश्रू तर वडिलांच्या चेहऱ्यावर कष्टाचे चीज झाल्याचा अभिमान स्पष्ट दिसत होता. मुलाने अधिकारी होऊन कुटुंबाचे स्वप्न साकार केल्याने गावकऱ्यांनीही त्याचे जोरदार स्वागत केले.

हर्षल पाटील यांची ही यशोगाथा ग्रामीण भागातील विद्यार्थ्यांसाठी प्रेरणादायी ठरत आहे. परिस्थिती कितीही कठीण असली तरी मेहनत, जिद्द आणि योग्य दिशा असेल तर कोणतीही उंची गाठता येते, हे त्यांनी सिद्ध करून दाखवले आहे.