* जेष्ठ मासानिमित्त प्रथमच सामूहिक आयोजन
* परंपरा, संस्कृती आणि आपुलकीचा अनोखा संगम
नगरदेवळा / प्रतिनिधी :- जेष्ठ मासाच्या पारंपरिक पर्वानिमित्त नगरदेवळा येथील लाडशाखीय वाणी समाजाच्या वतीने आयोजित करण्यात आलेला “माहेरवाशिणी स्नेहमेळावा व सत्कार समारंभ” अत्यंत उत्साहपूर्ण आणि पारंपरिक वातावरणात मोठ्या आनंदात संपन्न झाला. समाजातील माहेरवाशिणींना सन्मान देत नाती, संस्कृती आणि आपुलकी जपण्याचा सुंदर संदेश या कार्यक्रमातून देण्यात आला.
खान्देशात जेष्ठ मासामध्ये “माहेरवाशिणी” हा पारंपरिक सण विशेष उत्साहात साजरा केला जातो. विवाहानंतर सासरी गेलेल्या मुलींना प्रेमाने माहेरी बोलावणे, त्यांचे स्वागत करणे, औक्षण करून सन्मान करणे आणि नात्यांतील जिव्हाळा अधिक दृढ करणे, ही या परंपरेमागील भावना मानली जाते. ग्रामीण भागात आजही ही सामाजिक आणि सांस्कृतिक परंपरा मोठ्या आदराने जपली जाते.
याच पारंपरिक संस्कृतीचा वारसा जपत नगरदेवळा येथील लाडशाखीय वाणी समाजाच्या वतीने प्रथमच सामूहिक स्वरूपात “माहेरवाशिणी स्नेहमेळावा” आयोजित करण्यात आला होता. समाजातील सर्व माहेरवाशिणी यानिमित्त आपल्या माहेरी नगरदेवळा येथे आल्या होत्या. त्यामुळे संपूर्ण कार्यक्रमाला भावनिक आणि कौटुंबिक आपुलकीची विशेष किनार लाभली.
कार्यक्रमस्थळी आकर्षक सजावट, फुलांची आरास आणि पारंपरिक वातावरण पाहायला मिळाले. उपस्थित महिलांचे औक्षण करून पारंपरिक पद्धतीने स्वागत करण्यात आले. यावेळी समाजातील ज्येष्ठ महिलांचा सन्मान करण्यात आला तसेच विविध सांस्कृतिक उपक्रम, गप्पागोष्टी आणि स्नेहसंमेलनामुळे कार्यक्रमाला विशेष रंगत आली.
समाजातील महिलांनी पारंपरिक वेशभूषेत उत्स्फूर्त सहभाग घेतला. “माहेर” या शब्दाशी जोडलेली माया, जिव्हाळा आणि भावनिक नाते या कार्यक्रमातून प्रकर्षाने जाणवले. समाजातील एकोपा, प्रेम आणि सांस्कृतिक वारसा पुढील पिढीपर्यंत पोहोचविण्याचे महत्त्वही यावेळी अधोरेखित करण्यात आले.
कार्यक्रमाच्या माध्यमातून समाजातील महिलांना एकत्र येण्याची, जुन्या आठवणींना उजाळा देण्याची आणि सामाजिक बंध अधिक दृढ करण्याची संधी मिळाली. उपस्थितांनी कार्यक्रमाचे कौतुक करीत आयोजकांचे अभिनंदन केले. लाडशाखीय वाणी समाजाच्या या उपक्रमामुळे नगरदेवळा परिसरात सामाजिक ऐक्य, परंपरा आणि संस्कृती जपणारा आदर्श निर्माण झाल्याची भावना उपस्थितांकडून व्यक्त करण्यात आली.
Social Plugin