गायीला “राष्ट्रपशू” घोषित करण्याची मागणी पुन्हा ऐरणीवर!

* बकरी ईदच्या पार्श्वभूमीवर मुस्लिम संघटनांचा पुढाकार

* देशभक्त मुस्लिम समाजाकडून सरकारला आवाहन

* गोवंश हत्याबंदी, व्यापारबंदी आणि आयात-निर्यात बंदीची मागणी

* सोशल मीडियावर मोहिमेला वेग, केंद्र सरकारने निर्णय घ्यावा अशी भावना

नवी दिल्ली / प्रतिनिधी :- देशभरात गायीला “राष्ट्रीय पशू” घोषित करण्याची मागणी पुन्हा एकदा जोर धरू लागली असून, यावेळी विशेष म्हणजे अनेक मुस्लिम संघटना, सामाजिक कार्यकर्ते आणि देशभक्त मुस्लिम समाजातील नागरिकांनीही या मागणीला उघड समर्थन दिल्याचे चित्र दिसून येत आहे. आगामी बकरी ईदच्या पार्श्वभूमीवर सोशल मीडियावर मोठ्या प्रमाणात मोहिमा सुरू असून गोवंश संरक्षण, गोहत्या बंदी आणि धार्मिक सलोखा याबाबत चर्चांना वेग आला आहे.

सोशल मीडियावर व्हायरल होत असलेल्या पोस्टर्समध्ये “गाय को राष्ट्रीय पशु घोषित किया जाएं” अशी मागणी करण्यात आली आहे. तसेच देशातील सर्व बूचडखाने बंद करणे, गायीशी संबंधित वस्तूंचा व्यापार थांबवणे आणि गोवंशाशी संबंधित वस्तूंची आयात-निर्यात पूर्णपणे बंद करण्याची मागणी करण्यात आली आहे. “Boycott Cow Qurbani” अशा आशयाचे संदेशही मोठ्या प्रमाणावर शेअर केले जात आहेत.

* गाय केवळ धार्मिक नव्हे, तर राष्ट्रीय श्रद्धेचा विषय :- अनेक सामाजिक आणि धार्मिक संघटनांच्या मते, गाय ही भारतीय संस्कृती, कृषी व्यवस्था, ग्रामीण अर्थव्यवस्था आणि धार्मिक श्रद्धेचा अविभाज्य भाग आहे. शेतकऱ्यांच्या जीवनात गायीचे महत्त्व आजही कायम असून दुग्धव्यवसाय आणि शेती व्यवस्थेत गोवंश महत्त्वाची भूमिका बजावत असल्याने गोसंवर्धनासाठी राष्ट्रीय स्तरावर ठोस धोरण राबवावे, अशी मागणी पुढे येत आहे.

* मुस्लिम समाजाकडूनही सकारात्मक भूमिका :- काही मुस्लिम संघटनांनी आणि युवक गटांनी बकरी ईदच्या पार्श्वभूमीवर कायद्याचे पालन करण्याचे आवाहन केले आहे. “महाराष्ट्र गोवंश हत्या बंदी कायदा” अंतर्गत गाय, बैल आणि वळू यांच्या हत्येवर बंदी असल्याने मुस्लिम बांधवांनी कायद्याने परवानगी असलेल्या जनावरांचीच कुर्बानी करावी, असे संदेश सोशल मीडियावर प्रसारित होत आहेत.

“सकल मुस्लिम युवक समाज” या नावाने व्हायरल झालेल्या पोस्टमध्ये आठवडी बाजारात गोवंश खरेदी-विक्री पूर्णपणे बंद करण्याची मागणी करण्यात आली आहे. तसेच शेतकऱ्यांनी वृद्ध, भाकड आणि अशक्त जनावरे विक्रीसाठी न पाठवता गोसेवा केंद्रात जमा करावीत, असे आवाहनही करण्यात आले आहे.

* मौलाना कासमी यांच्या वक्तव्याची चर्चा :- दरम्यान, काही दिवसांपूर्वी जमीयत उलेमा-ए-हिंदचे अध्यक्ष मौलाना अरशद मदनी यांच्या “गायला राष्ट्रपशू घोषित करावे” या वक्तव्याचीही पुन्हा चर्चा सुरू झाली आहे. “देशातील बहुसंख्य जनता गायीला माता मानते, त्यामुळे सरकारने यावर सकारात्मक विचार करावा,” अशी भावना विविध स्तरांतून व्यक्त होत आहे.

* सोशल मीडियावर जोरदार मोहीम :- फेसबुक, व्हॉट्स अँप, इन्स्टाग्राम आणि यूट्यूबसह विविध सोशल मीडिया प्लॅटफॉर्मवर “गायीला राष्ट्रपशू घोषित करा” या मोहिमेला मोठा प्रतिसाद मिळत आहे. काही ठिकाणी हिंदू-मुस्लिम बांधवांनी संयुक्तपणे गोसंवर्धनासाठी जनजागृती मोहिमा सुरू केल्याचेही समोर आले आहे.

* तज्ज्ञांचे मत काय ? :- काही कायदे तज्ज्ञ आणि सामाजिक अभ्यासकांच्या मते, कोणत्याही प्राण्याला “राष्ट्रीय पशू” घोषित करण्याचा निर्णय हा केवळ भावनिक नव्हे, तर घटनात्मक, पर्यावरणीय आणि सामाजिक पैलूंचा विचार करून घेतला जाणे आवश्यक आहे. त्यामुळे या विषयावर व्यापक राष्ट्रीय चर्चा होण्याची गरज व्यक्त केली जात आहे.

* केंद्र सरकार काय भूमिका घेणार ? :- सोशल मीडियावरील वाढती मोहीम, धार्मिक संघटनांची मागणी आणि विविध समाजघटकांकडून व्यक्त होणाऱ्या भावना लक्षात घेता केंद्र सरकार यावर काय भूमिका घेते, याकडे आता देशाचे लक्ष लागले आहे. बकरी ईदच्या पार्श्वभूमीवर हा मुद्दा पुन्हा एकदा राष्ट्रीय चर्चेच्या केंद्रस्थानी आला आहे.