भडगावच्या चोरडिया अभ्यासिकेचा यशस्वी वारसा

* चार वर्षांत 70 हून अधिक विद्यार्थ्यांची सरकारी सेवेत भरारी

* ग्रामीण विद्यार्थ्यांसाठी वरदान ठरलेली अभ्यासिका

* पोलीस दल, सैन्यदल आणि विविध स्पर्धा परीक्षांमध्ये घवघवीत यश

भडगाव / निलेश महाले :- भडगाव नगर परिषद संचलित कै. शेठ बक्तावरमल चोरडिया अभ्यासिका ही ग्रामीण भागातील होतकरू आणि स्पर्धा परीक्षांची तयारी करणाऱ्या विद्यार्थ्यांसाठी आशेचा किरण ठरत असून, अवघ्या चार वर्षांच्या कालावधीत या अभ्यासिकेतून 70 हून अधिक विद्यार्थ्यांनी विविध स्पर्धा परीक्षा उत्तीर्ण करून शासकीय सेवेत यशस्वी भरारी घेतली आहे. भडगाव नगर परिषदेचे मुख्याधिकारी विकास नवाळे यांच्या दूरदृष्टीतून साकार झालेली ही अभ्यासिका आज तालुक्याच्या शैक्षणिक प्रगतीचे एक महत्त्वाचे केंद्र म्हणून ओळखली जात आहे.

स्पर्धा परीक्षांसाठी आवश्यक असलेले शांत, अभ्यासपूर्ण आणि प्रेरणादायी वातावरण उपलब्ध करून देण्याच्या उद्देशाने सुरू करण्यात आलेल्या या अभ्यासिकेचा लाभ दरवर्षी शेकडो विद्यार्थी घेत आहेत. विशेष म्हणजे दरवर्षी 20 हून अधिक विद्यार्थी विविध स्पर्धा परीक्षांमध्ये यश संपादन करून शासकीय सेवेत प्रवेश मिळवत आहेत.

यावर्षीही अभ्यासिकेतील अनेक विद्यार्थ्यांनी पोलीस भरती आणि भारतीय सैन्यदलात यश मिळवत अभ्यासिकेची गौरवशाली परंपरा कायम राखली आहे. पोलीस दलात निवड झालेल्यांमध्ये समाधान पवार (मुंबई कारागृह पोलीस), गोपाल भोई (नवी मुंबई पोलीस), कुणाल मोरे (मुंबई पोलीस) आणि उमेश सावकार (मुंबई पोलीस) यांचा समावेश आहे. तसेच भारतीय सैन्यदलात दिग्विजय पाटील, कुणाल पाटील, प्रितेश पाटील, मयूर मांडोळे, उमेश वाघ, विवेक कंखरे, मंगेश अहिरे आणि रमेश पाटील यांनी यश संपादन करून भडगाव तालुक्याचे नाव उज्ज्वल केले आहे.

याशिवाय अखिल भारतीय आयुर्विज्ञान संस्था (AIIMS) संबंधित पदांसाठीही अभ्यासिकेतील विद्यार्थ्यांनी उल्लेखनीय कामगिरी केली आहे. जितेंद्र अहिरे यांची अभियंता पदावर तर भूपेंद्र पाटील यांची औषध निर्माण अधिकारी (फार्मसी ऑफिसर) पदावर निवड झाली आहे. या यशामुळे अभ्यासिकेची गुणवत्ता आणि मार्गदर्शनाची प्रभाविता अधोरेखित झाली आहे.

या यशामागे विद्यार्थ्यांची अथक मेहनत, नगर परिषदेचे सातत्यपूर्ण सहकार्य तसेच मार्गदर्शक म्हणून रवींद्र लांडे यांचे मोलाचे योगदान असल्याचे सांगितले जाते. अभ्यासिकेची दैनंदिन देखभाल आणि व्यवस्थापनाची जबाबदारी शुभम रविंद्र बागुल आणि भडगाव नगर परिषदेचे कर्मचारी यशस्वीपणे सांभाळत आहेत.

आजही अनेक विद्यार्थी या अभ्यासिकेत विविध राष्ट्रीय आणि राज्यस्तरीय स्पर्धा परीक्षांची तयारी करीत असून, भविष्यात आणखी अनेक युवक-युवती शासकीय सेवेत झेपावतील, असा विश्वास व्यक्त केला जात आहे.

ग्रामीण भागातील विद्यार्थ्यांना दर्जेदार अभ्यासाचे वातावरण, मार्गदर्शन आणि स्पर्धा परीक्षांसाठी आवश्यक सुविधा उपलब्ध करून देणारी ही संकल्पना राज्यातील प्रत्येक तालुक्यात राबविण्यात यावी, अशी अपेक्षा नागरिकांकडून व्यक्त होत आहे. भडगाव तालुक्यातील अनेक कुटुंबांच्या यशस्वी भवितव्याची पायाभरणी करणारी ही अभ्यासिका आज ग्रामीण युवक-युवतींसाठी प्रेरणेचे केंद्र आणि यशाचा विश्वासार्ह मार्ग ठरत आहे.

ठळक मुद्दे 

▪ मुख्याधिकारी विकास नवाळे यांच्या संकल्पनेतून अभ्यासिकेची स्थापना

▪ चार वर्षांत 70 हून अधिक विद्यार्थ्यांचे विविध शासकीय सेवांमध्ये यश

▪ दरवर्षी 20 पेक्षा अधिक विद्यार्थी स्पर्धा परीक्षांमध्ये यशस्वी

▪ यावर्षी पोलीस भरती व भारतीय सैन्यदलात अनेक विद्यार्थ्यांची निवड

▪ AIIMS संबंधित पदांसह विविध क्षेत्रांत उल्लेखनीय कामगिरी

▪ ग्रामीण विद्यार्थ्यांसाठी प्रेरणादायी ठरलेली अभ्यासिका

▪ राज्यातील प्रत्येक तालुक्यात अशी संकल्पना राबविण्याची मागणी